USB神經線 + 一些正確資料

我一直都唔想批評玩 Hi-Fi 嘅人，但眼見好多人買貴 Headphone/Earphone，同一大堆"似 High-end" 嘅品牌，D雜誌又亂吹... 但又人信喎...都算了，但估唔到今次有報章信口雌黃到咁，我睇完笑咗好耐...

"...一條USB接線只賣二百五十元..." 

"...最驚喜是當將它接駁到音響系統之後，那種脫胎換骨的音效改善，簡直如同打通了大腦神經！"

信佢就真係有神經病! 你話 Analog 線都算了，USB 係串流數據傳送，又有數據錯誤糾正，其中由數據錯誤導致嘅解碼失真非常低，就算能夠影響嘅都只會係一D "Click"聲，或者CD跳線/斷聲那種(仲要係好大問題時先會出現)，一般由少量數據錯誤導致嘅失真，普遍人好難擦覺到。

改善音質!? 作者真係當我地低能? 就算係鱔稿都唔係咁寫啦?

大家再諗諗，如果話有條USB線能大大改變音質，即係話用咗佢D數據會變啦，咁點過FILE呀，一條線唔能夠100%傳送數據，咁係條線仲要得?

以正視聽
既然寫得出呢篇BLOG，咁都要寫一啲正確嘅資料。以下我唔會用太過專業嘅解釋，但我歡迎作深入技術嘅討論。

我地目前大多聽嘅 iPod, MP3 機等等，所用到嘅線大多有二種: 一條係USB數據線，另一條係 Headphone/Earphone 線。
USB數據線功能只係傳送數據，所以選優質USB線只要注意下面幾點就應該OK:

1. USB 線本身是一條包含有四條電線加防干擾織網的傳送線: 二條電源線 + 二條訊號線(或一對平衡雙絞線 Balanced twisted pair wires，不過有部份USB 線並沒有使用雙絞線呢，如果有的話質量會好一點。)，USB線有基本設計標準和生產建議，大部份有品牌USB 線都會符合標準。
2. 電線本身用料可能會影響數據傳送，質量差(真係好差嘅Cheap線)先會導致資料遺失 (Data lost)，這亦都係點解USB有平有貴嘅一個原因，不過價格相差應該唔會好大。
3. 好嘅電線材料會令 USB 線耐用。差嘅會好易斷，膠料會易變色、變硬、 變脆。
4. USB 插頭，外殼同接觸點金屬材料會影響傳送質量同耐用程度，所以點解好多時啲接頭會用優質鍍金就係咁解。(不過依從好多鍍金唔掂....)
5. USB 長度係有一定限制，最大不可超過 5 米。

所以，好嘅USB電線會令數據傳送接近 100%，幸好設計USB嘅人一早有考慮呢個問題，係數據傳送時加入錯誤糾正功能，要出錯都幾難。所以話一條跟機送嘅USB線(或者30, 40 元)唔會比幾佰元嘅差!
所以，如果有人話 USB 線對音樂播放質量嘅關係，最多只可以話差嘅線會降低傳送準確度已而，就好似用USB抄FILE會出錯嘅情況咁。好既USB線絕不可能提升音質，至多可以話保持應有嘅音質。

另一方面，音質主要取決於數碼音樂的編碼格式同參數，以及數碼音樂轉換時嘅準確度，然後就係音樂播放機嘅設計同用料，再其次(但主要)是  Headphone/Earphone 設計同用料質量，當中耳機發聲部份又係好重要，反而 Headphone/Earphone 線影響相對輕微，有一樣嘢一般人可能忽略嘅係 Headphone/Earphone 跟音樂播放機嘅 阻抗匹配 (Impedance Matching) ，呢個係好重要嘅，有無試過有啲 earphone 喺舊款電話會特別差，但一用原裝 earphone 就好好? 咁就係因為舊款電話原本為 Headfree earphone 而設，阻抗跟一般 walkman earphone 不一樣所致。其實音樂播放機的說明書和 Headphone/Earphone 嘅包裝有寫出嚟，大家可以睇睇。

仲有，因為Headphone/Earphone的播放係 Analog 訊號，Headphone/Earphone 線或多或少有"一丁點"影響，但我敢講，大部份人無法分得出一條普遍線同一條上千元線嘅分別。(心理因素除外) 所以我好奇點解有商店賣啲土炮 Earphone 線要價幾佰甚至上千元。

請到呢到，都係想大家諗下買嘢時了解多一啲。我呢篇一定得罪好多商人、寫手、甚至死忠。不過我係一個 Engineer同鍾意音樂嘅人，只想認同有理論支持嘅事而已。

[Update 20120216]
補充一點，先不評論這條 AudioQuest 與音質的關係如何，但從網上看到這cable的製作應該不錯，至於$250值得與否就因人而定，作為一條優質 USB Cable或者可以吧，不過同一個價錢應該也有很多選擇呢。